北海道之旅 Day 4: 登別 (16mar07)

經過了幾日既行程, 加上平日返工都9點起身既我...實在冇力氣早起食酒店提供的早餐, 或者可以說, Washington Hotel II的早餐沒有令我要早起的衝動.......

10:00am check out後, 便出去逛逛看看有什麼好野食.  但大部份食店都未開門...唯有邊行邊等.  最後我們在JR Tower見到食buffet那間店好多人在排隊, 心想一定有好野啦~~走去排埋一份......結果--水準一般~~~~最慘係間店d暖氣好勁, 勁都好似夏天食大排檔一樣!

今天我們要離開札幌要去登別了.

登別的溫泉酒店(Hotel Mahoroba), 每天有一班shuttle bus接送客人從札幌到登別(hehe...又可慳返$500車費), 我地緊係唔錯過啦.....

登別那裡主要有4個景點﹕熊牧場, 依達時代村, 地獄谷, 海洋館.

因為去到登別已經3時多, 所以我地先去依達時代村和地獄谷.

依達時代村是看江戶時代的忍者住的地方, 生活和文化...入面有間怪怪忍者屋都幾好玩, 好似鬼屋+迷宮一樣. 之後再看忍者show, 不過全部都係講日文, 都唔知佢講咩!!?

有人說, 沒有去過地獄谷就等於沒去過登別. 帶有陣陣硫磺味的地獄谷直徑長450米, 面積約11萬平方千米, 是火山噴發遺址, 亦是一座睡火山. 好多人都話硫磺味好臭, 但我就好鍾意聞

 

可能我好鍾意行山 (當然係行d唔崎嶇又安全又易行的山啦), 又鍾意睇d大自然風景, 所以我地逗留左地獄谷左好耐...可以通雪山咁跑, 可以'訓'係d雪上面, 實在好過行商場!!

我地行呀行, 已經行到開始比較少遊客的地方, 我地沿住指示去大湯沼, 由於四周都冇人, 面對前面雪地, 我們見到地上有'行'跡, 就放心跟上.....

在白汒汒的雪地上行了十分鐘, yee?? 點解只得一條上山既路+一條繩. 有條繩係度, 你們可以想像下個山有幾斜!!  正當我懷疑緊/考慮緊應唔應該繼續時, 山上面老遠有兩位日本女士. 我們你眼望我眼, 望左都好耐......  因為個小山都幾斜下, 你知啦, 上山我都覺得唔易, 佢地落山仲難~ 過左一陣, 佢地大叫'circle', 就開始行落黎.

我見佢地都行得好小心, 咁我就問亞樹我地上唔上去? 佢實話去啦~

我地行到一半同佢地相遇, 佢地又話'circle', 我諗佢係想話比我地知冇行錯路掛!?

你地睇相可能睇唔出個斜度, 但係可以睇到o個度真係一個咩都冇, 得一條繩堯住d樹既雪山~ 有驚無險, 都安全到步!

返到酒店先各自去浸溫泉, 浸完之後就醫肚肚~~

Hotel Mahoroba 的放題很有名，親身試過之後就更加覺得冇得彈!! 三種蟹任吃, 有很多壽司, 刺身, 串燒, 仲有我至愛既炭燒帆立貝 (最少食左10粒) 實在太多太多choice. 那些蟹腳極大，蟹肉又多又肥又甜, 好懷念那晚的放題~~ 仲有甜品都好正! 我食都亞樹食飽我仲食緊, 依間hotel我大力推介比大家!

宿: Hotel Mahoroba

http://tohoresort.com/mahoroba/

北海道之旅 Day 3: 札幌 (15mar07)

宏樂園的早餐都幾豐富, 而且是一set一set咁預備好比你, 感覺係好'貴賓'式既享受.  圖中有個蒸豆腐, 係現場即點火蒸的, 一人一個, 好得意....食完早餐, 休息一會後, 電話無拿拿嚮起, 原來是接待處打來叫我地check out.  check out? 10:10am 炸woo~ 後來我地先知所有日本hotel都係10:00am check out...O! 我地仲未浸多次溫泉架~~

 咁我同佢地要求可唔可以比多30mins我地......好彩佢地都肯

之後我地就坐2號巴士去小樽lu~~~~~

臨離開小樽前, 我地再次去三角市場食飽飽先坐JR返札幌. 

我食炭燒帆立貝定食, 亞樹食三文魚, 帆立貝, 魚子定食.

去到札幌返酒店hea一陣先, 八八掛掛既我雖然一定唔會買酒店的飲品, 但點都要睇下先開心....咁就出事喇....d一枝枝既drink係有出無入, 自動記數, 放唔返入去!!!! 我仲要係拿左支'幾十度既烈酒'出黎......肯定好貴啦~~~~~於是...當然係亞樹do something既時候喇~~~~~

擺平左'烈酒'事件, 我地就出發去'白之戀人工場...不過我可以話比大家知, o個度係超級無聊, 仲要比$$入場, 浪費我d寶貴時間, 後尾仲比我發現原來東京機場買白之戀人仲平過o係佢地個工場買 (因為機場唔駛比5%tax)

之後就再去行大通公園 , 因為落雪, 冇咩好睇, 但夏天應該靚d掛?!

晚餐亞樹死心不熄要去搵拉麵橫丁附近的'新拉麵橫丁', 除左食拉麵之餘, 因為o個間叫'味之計時台'既店舖有d一箱箱的拉麵可以買走.....佢當然係想買啦~~ 我地返香港已煮左黎食, 都好好好味架~~~~

由於我不太喜歡食麵, 我冇食到...因為我好想食壽司呀~~ wah hahaha...在狸小路有間迴轉壽司, d帆立貝(又係帆立貝)好大隻架~~~~~~~依家睇見到好想食......

今晚, 我地一共食左三餐 (其實我冇食拉麵, 應該只算兩餐), 最後一餐 去左食咖哩飯, 所以, 今日基本上只係食! 去左好少地方玩.  但又或者可以話, 日本d shopping mall 實在太早關門了~

宿: Washington Hotel II

北海道之旅 Day 2: 小樽 (14mar07)

第二天我們在hotel食完早餐, 將d大型行李寄存係hotel, 便由札幌坐JR到小樽. 去到小樽, 就立即去JR站旁的三角市場睇下有咩海鮮食, 我們選了活生生的帆立貝做刺生.....仲買了一些乾瑤柱同即食帆立貝返香港.....HEHE.....

跟住我地就四圍行下, 什麼博物館...oh no..冇咩興趣

行到去小樽運河, 好浪漫呀~~ 我們在運河邊留下'體印', hahaaha, 好好玩~

跟住去'北一硝子三號館'食六層高的雪糕, 包括海膽味, 綠茶味, 哈蜜瓜味和牛奶味等...好滑~ 北海道d雪糕真係好好味...成個trip食得最多就係雪糕!!!!

lunch就食燒牛肉, 但我都唔食牛o既, 所以我只係食野菜~

我地仲去左小樽オルゴール堂２号館自製音樂盒.  選好配件和音樂盒後, 店員會安排混合膠水比我地, 仲用國語去介紹個製作過程tim.  O...原來佢係國內人. 

個音樂盒我地design架!  首音樂係 Love Generation. 

之後就係成個trip既重點: 宏樂園浸溫泉.  我地間房有私家露天風呂.....好爽!

去宏樂園都好方便, 在JR站旁的中央巴士站 ,搭2號巴士, 便可以在宏樂園正門落車. 巴士上有提示現在是什麼站, 車程大約半小時

宏樂園有提供埋dinner, 望落去個賣相好好, 有好多碟好似好開心, 左試試右試試, 得得意咁... 但其實我覺得只是OK好味!

登登登!!!!!!  露天風呂出場啦......望住個雪山浸溫泉, 真係....好爽~~  加上有時有雪落...仲爽~ 真係畢生難忘!  雖然房租唔平, 但係好值得!

小樽宏樂園 http://www.mics.co.jp/com/kourakuen/

北海道之旅 Day 1: 札幌 (13mar07)

honeymoon一直想去relax, 唔駛用腦既地方.  之前首選係Maldives, 去唔成, 睇下BB Yee個blog當去左啦!

後來選了北海道, 北海道係我唯一對日本有興趣的地方, 咁就真係一生人去一次咁大把~~~~

我們搭ANA, 要在東京轉機. 大家有冇留意我轉左新髮型?  其實都唔係咩新style, 因我平均兩年左右都會剪返依個頭....都係最鍾意依個髮型

到北海道第一站係札幌, 到達時已經8時多, 天都黑晒.  其實我們的hotel很近JR, 但剛到步, 方向感未有, 天又黑, 仲要落大雪, 我地都要搵左成十五分鐘先安全去到hotel....check in後就立即出去搵拉麵食....

去左札幌最有名拉麵橫丁, 是一條拉麵街, 拉麵橫丁麵舖的特色就是舖面很小，而且只有Bar位，圍著開放式廚房，原因麵舖多是一人經營，是拉麵師傅在你面對即煮你所叫的湯底&拉麵, 我地選左一間叫'滿龍'的舖子. 

我叫了海鮮拉麵, 入面有大蝦, 帆立貝等海鮮, 好正, 好新鮮呀....我平時都唔鍾意食拉麵都覺得好好味....

亞樹個拉麵+叉燒狂就一定叫叉燒拉麵

食飽飽之後就返酒店, 因為日本d舖頭8:00pm就close, 完全冇野行

 

宿: Washington Hotel II, 夜班個接待英文幾OK, 又helpful, 但如果大家去既話book Washington Hotel會好d, 因為一出JR就見到, 唔駛搵

咖哩豬排飯

去日本買了好多咖哩返香港, 今晚已經急不及待去煮咖哩豬排飯.  好好味呀~~~~~~

 

我honeymoon返黎啦

嘩! 8日話咁快就過, 去玩d時間果然過得快.......我昨晚成零晨先返到屋企, 好彩今日都係holiday, 亞樹就慘d, 要返工

為左答謝一班婚禮當日十分幫手的兄弟姊妹, 教會好友, 我地honeymoon亦不忘買了大量手信去多謝大家既支持 (買比人地仲多過買比自己, 大家記住請返我地食

). 小小心意, 希望各位笑納同鍾意啦~~

有cookies同cake

 

有北海道出名既哈密瓜威化餅, 白之戀人(Jessie request先買), Royce朱古力薯片, 東京買的綠茶果子

 

元貝, 栗米朱古力, 六花亭, 係東京機場有錢剩, 見到白之戀人居然免稅, 所以買多盒

我最鍾意既六花亭, 白朱古力入面有粒士多啤梨, yummy yummy~

P.S. 有冇人拍下我結婚當日既相呀? 可唔可以email比我或者亞樹?  好想睇呀!  thanks in advance!

 

 

Church Invitation Card

我今個星期日結婚啦! 大家記得早d到~~

3時正, 以馬內利浸信會

烈火戰女

我弟弟買了一個新頭盔.  當依個新頭盔未沾上弟弟既香氣前, 我便試一試帶它.  感覺係: 幾型!  怪不得大部份男孩子都中意駕電單車啦~~

咁快有賀禮收?

我之前成日同朋友講, 早d賀禮比我既話, 就打過8折比佢啦!

但真係估唔到, 昨天完了崇拜, 真的有人提早比賀禮我.  嘩嘩嘩! 好happy呀~ 仲要有個我冇比帖佢都賀禮比我呀!

但當然佢地冇自動打8折啦~

小屋仔 vs 大夢想

我最終係結婚前申請到一人公屋啦~~  嘩! 但係真係好細好細law~ 全屋只有8x呎, 仲要連獨立廚房同洗手間. 都唔明房署當d人係咩, 地方咁細, 怪不得香港咁多人發癲 law~

不過我都唔理咁多, 反正我都係打算婚後, 生埋個B就申請調遷, 到時就有又平又正既屋住, 實現我既大夢想了!!

只可放一張單人床

廚房同洗手間

廚房個size都ok, 反正都只係煮公仔麵.    依個洗手間, 亞樹有入冇出 (出唔到呀!)

           

個veiw是全屋最值得欣賞的地方

七年之癢午餐

最後我地去Sanlitun度食!

就黎做老襯既亞樹~ 你看! 佢滿懷心事....有咩唔怕講woo!

他吃牛排

我吃鱸魚

好好味的士多啤梨雪糕